‘അജഗജാന്തര’ത്തിന്റെ റിലീസ് തീയ്യതി പ്രഖ്യാപിച്ചു.

ആൻ്റണി വർഗ്ഗീസിനെ നായകനാക്കി ടിനു പാപ്പച്ചന്‍ സംവിധാനം ചെയ്യുന്ന ചിത്രം ‘അജഗജാന്തര’ത്തിന്റെ റിലീസ് തീയ്യതി പ്രഖ്യാപിച്ചു. സെക്കൻഡ് ഷോകൾ തീയേറ്ററുകളിൽ അനുവദിച്ച പശ്ചാത്തലത്തിലാണ് ചിത്രത്തിൻ്റെ റിലീസ് തീയ്യതി പ്രഖ്യാപിച്ചിരുന്നത്. മുൻപ് ഇക്കാരണം ചൂണ്ടിക്കാട്ടി ചിത്രത്തിൻ്റെ റിലീസ് തീയ്യതി മാറ്റിയിരുന്നു. മുൻപ് അജഗജാന്തരം മാർച്ച് 26ന് റിലീസ് ചെയ്യാനിരിക്കുകയായിരുന്നു. എന്നാ തീയേറ്ററുകളുടെ പ്രവർത്തന സമയം ഉച്ചയ്ക്ക് 12 മുതൽ അർദ്ധരാത്രി പന്ത്രണ്ട് മണി വരെ ആക്കിയതോടെയാണ് പല ചിത്രങ്ങളും റിലീസ് തീയ്യതി പുതുക്കി നിശ്ചയിച്ചിരിക്കുന്നത്.

അത്തരത്തിലാണ് അജഗജാന്തരം ടീമും ചിത്രത്തിൻ്റെ റിലീസ് തീയ്യതി പുതുക്കിയത്. മെയ് 28നാണ് ചിത്രം തീയേറ്ററുകളിലേക്കെത്തുക എന്നാണ് അണിയറപ്രവർത്തകർ അറിയിച്ചിരിക്കുന്നത്. പുതിയ പോസ്റ്റർ പങ്കുവെച്ചുകൊണ്ടാണ് റിലീസ് തീയ്യതി പ്രഖ്യാപിച്ചിരിക്കുന്നത്. ഉത്സവപ്പറമ്പിൻ്റെ പശ്ചാത്തലത്തിൽ ഒരുങ്ങിയ ആക്ഷൻ ചിത്രമാണ് അജഗജാന്തരം. ചിത്രത്തിൻ്റെ ഫസ്റ്റ് ലുക്ക്, സെക്കൻഡ് ലുക്ക് പോസ്റ്ററുകൾ സമൂഹമാധ്യമങ്ങളിൽ തരംഗമായി മാറിയിരുന്നു.

ആക്ഷൻ രംഗങ്ങൾക്ക് വളരെ പ്രാധാന്യം നൽകി ചിത്രീകരിച്ചിരിക്കുന്ന ഈ സിനിമ സിൽവർ ബേ പ്രൊഡക്ഷൻസിന്‍റെ ബാനറിൽ എമ്മാനുവൽ ജോസഫും അജിത് തലാപ്പിള്ളിയും ചേർന്നാണ് നിർമിച്ചിരിക്കുന്നത്. ഛായാഗ്രഹണം ജിന്‍റോ ജോർജ്, എഡിറ്റർ ഷമീർ മുഹമ്മദ്‌, സംഗീതം ജസ്റ്റിൻ വർഗീസ്, സൗണ്ട് ഡിസൈൻ രംഗനാഥ് രവി, ആർട്ട്‌ ഗോകുൽ ദാസ്, വസത്രാലങ്കാരം മഷർ ഹംസ, മേക്കപ്പ് റോണക്സ് സേവ്യർ, സ്റ്റണ്ട് സുപ്രീം സുന്ദർ, ചീഫ് അസോസിയേറ്റ് കണ്ണൻ എസ് ഉള്ളൂർ, പ്രൊഡക്ഷൻ കൺട്രോളർ ബാദുഷ, പി ആർ ഒ മഞ്ജു ഗോപിനാഥ്, ഡിജിറ്റൽ മാർക്കറ്റിംഗ് ഹെയിൻസ്‌.