ഫെബ്രുവരി മുതൽ കേരളത്തിലെ നാലു ജില്ലകളിലായി ഐ. എഫ്. എഫ്. കെ

കോവിഡ് പ്രോട്ടോകോൾ പാലിച്ചുകൊണ്ട് ഫെബ്രുവരി മുതൽ ആരംഭിക്കുന്ന കേരളത്തിന്റെ അന്താരാഷ്ട്ര ചലച്ചിത്രമേളയുടെ (ഐ. എഫ്. എഫ്. കെ) 25 -മത് പതിപ്പ് സംസ്ഥാനത്തെ നാലു ജില്ലകളിൽ നടക്കുമെന്ന് കേരള സാംസ്കാരിക മന്ത്രി എ കെ ബാലൻ അറിയിച്ചു. ചലച്ചിത്രമേള സാധാരണയായി തിരുവനന്തപുരത്താണ് നടത്തുന്നത്. കോവിഡ് കണക്കിലെടുത്ത് തിരക്ക് ഒഴിവാക്കാനായി തിരുവനന്തപുരം, എറണാകുളം, തലശ്ശേരി, പാലക്കാട്‌ എന്നിവയുൾപ്പെടെ നാലു പ്രദേശങ്ങളിൽ ഐ.എഫ്.എഫ്.കെ നടക്കും. ഡിസംബറിൽ നടത്താറുള്ള ചലച്ചിത്രമേള കോവിഡ് രോഗവ്യാപനത്തിന്റെ പശ്ചാത്തലത്തില്‍ നീട്ടികൊണ്ടു പോകേണ്ടിവന്നു. തിരുവനന്തപുരത്ത് 2021 ഫെബ്രുവരി 10 മുതല്‍ 14 വരെയും എറണാകുളത്ത് ഫെബുവരി 17 മുതല്‍ 21 വരെയും തലശ്ശേരിയില്‍ ഫെബുവരി 23 മുതല്‍ 27 വരെയും പാലക്കാട് മാര്‍ച്ച് 1 മുതല്‍ 5 വരെയും ആണ് മേള സംഘടിപ്പിക്കുന്നത്. ഓരോ മേഖലയിലും അഞ്ചു തിയേറ്ററുകളിലായി അഞ്ചു ദിവസങ്ങളില്‍ മേള നടക്കും. ഓരോ തിയേറ്ററിലും 200 പേര്‍ക്ക് മാത്രമേ പ്രവേശനം അനുവദിക്കുകയുള്ളൂ. കോവിഡിന്റെ പശ്ചാത്തലത്തിലാണ് ഇക്കുറി വിവിധ സ്ഥലങ്ങളില്‍ മേള സംഘടിപ്പിക്കുന്നത്.

തിരുവനന്തപുരത്ത് ഐ. എഫ്. എഫ്. കെ ഉദ്ഘാടനം ചെയ്ത് പാലക്കാട് സമാപിക്കും. ഡയറക്ടറെ കണ്ടുമുട്ടുക, മാസ്റ്റർ ക്ലാസുകൾ, മറ്റു ഇവന്റുകൾ എന്നിവ ഉൾപ്പെടെ നിരവധി പ്രോഗ്രാമുകൾ ഓൺലൈനിൽ നടത്തും. വിദേശ പ്രതിനിധികളും അതിഥികളും വേളയിൽ നേരിട്ട് പങ്കെടുക്കില്ല. അന്താരാഷ്ട്ര മല്‍സര വിഭാഗം, ലോക സിനിമാ വിഭാഗം, മലയാളം സിനിമ റ്റുഡേ, ഇന്ത്യന്‍ സിനിമ നൗ, കലൈഡോസ്കോപ്പ്, റെട്രോസ്പെക്റ്റീവ്, ഹോമേജ് തുടങ്ങി എല്ലാ വിഭാഗങ്ങളും മേളയില്‍ ഉണ്ടായിരിക്കും.ഒരു ദിവസം ഒരു തിയേറ്ററില്‍ നാലു ചിത്രങ്ങള്‍ വീതമാണ് പ്രദര്‍ശിപ്പിക്കുക. അന്താരാഷ്ട്ര മത്സര വിഭാഗം, ലോകസിനിമ വിഭാഗം എന്നിവയ്ക്ക് ഓരോ മേഖലകളിലും രണ്ട് വീതം പ്രദര്‍ശനങ്ങളും മറ്റുള്ള എല്ലാ വിഭാഗത്തിനും ഓരോ പ്രദര്‍ശനങ്ങള്‍ വീതവും ആയിരിക്കും ഉണ്ടാവുക.

ഡെലിഗേറ്റ് ഫീസ് പൊതു വിഭാഗത്തിന് 750 രൂപയും വിദ്യാര്‍ത്ഥികള്‍ക്ക് 400 രൂപയുമായി കുറച്ചിട്ടുണ്ട്. തങ്ങളുടെ സ്വദേശം ഉള്‍പ്പെടുന്ന മേഖലയില്‍ സംഘടിപ്പിക്കുന്ന മേളയില്‍ തന്നെ പ്രതിനിധികള്‍ ഡെലിഗേറ്റ് രജിസ്ട്രേഷന്‍ നടത്തേണ്ടതാണ്.

ചലച്ചിത്രമേളയ്ക്കായി ചില സ്റ്റാൻഡേർഡ് ഓപ്പറേറ്റിംഗ് നടപടിക്രമങ്ങളും (എസ്. ഒ. പി) മന്ത്രി നൽകി.

• അന്താരാഷ്ട്ര ചലച്ചിത്രമേളയുടെ വേദികളിൽ ആന്റിജൻ പരിശോധനയ്ക്കുള്ള ക്രമീകരണങ്ങൾ നടത്തും.
• അന്താരാഷ്ട്ര ചലച്ചിത്രമേള തുടങ്ങുന്നതിന് 48 മണിക്കൂര്‍ മുന്‍പ് കോവിഡ് നെഗറ്റീവ് ആണ് എന്നുള്ള സര്‍ട്ടിഫിക്കറ്റ് കൈവശമുള്ളവർക്ക് പാസുകൾ വിതരണം ചെയ്യും.
• തീയറ്ററുകളിലേക്കുള്ള എല്ലാ പ്രവേശനവും റിസർവേഷൻ അടിസ്ഥാനത്തിലായിരിക്കും.
• സിനിമാ ഹാളുകളിൽ പ്രവേശിക്കുന്നതിന് മുമ്പ് പ്രതിനിധികൾ താപനില പരിശോധിക്കുന്നതായിരിക്കും.
• ശാരീരിക അകലം എല്ലായ്പ്പോഴും നിലനിർത്തും.
• എല്ലാ സ്ക്രീനിംഗിനുശേഷവും തിയറ്ററുകൾ ശുചിത്വവൽക്കരിക്കും.