മമ്മൂട്ടിയുമൊന്നിച്ച് ബിഗ് സ്‌ക്രീനിൽ തുടക്കം കുറിച്ച രഘു കഴിഞ്ഞ ഏഴ് ദിവസമായി അബോധാവസ്ഥയിൽ ആശുപത്രിയില്‍ ചികിത്സയിൽ. കഴിഞ്ഞ 16ന് വീട്ടിൽ കുഴഞ്ഞുവീഴുകയായിരുന്നു രഘു. തുടർന്ന് ചേർത്തല താലൂക്കാശുപത്രിയിലും എറണാകുളത്തെ സ്വകാര്യ ആശുപത്രിയിലും പ്രവേശിപ്പിക്കുക ആയിരുന്നതായും റിപ്പോർട്ടുകൾ പറയുന്നു. തീവ്രപരിചരണ വിഭാഗത്തിൽ കഴിയുന്ന രഘുവിെൻറ ചികിത്സയുമായി ബന്ധപ്പെട്ട് ലക്ഷങ്ങൾ ആണ് വേണ്ടി വന്നത്. സാമ്പത്തികമായി പിന്നോക്കം നിൽക്കുന്ന കുടുംബത്തിന് ചികിത്സാചിലവ് താങ്ങാവുന്നതിലും അപ്പുറമാണ് എന്നും റിപ്പോർട്ടുകളുണ്ട്. സിനിമാ മേഖലയിലുള്ളവർ സഹായവുമായി എത്തുമെന്ന പ്രതീക്ഷയിലാണ് കുടുംബം.
1980ൽ ചെങ്ങന്നൂർ കൃസ്ത്യൻ കോളജിൽ ഡിഗ്രിക്ക് പഠിക്കുമ്പോഴാണ് നടൻ ശ്രീനിവാസൻ നേരിട്ടെത്തി സിനിമയിൽ അഭിനയിക്കാമോയെന്ന് ചോദിക്കുന്നത്. ഒരു ചായക്കടയിൽ ചായ കുടിച്ചു കൊണ്ടിരുന്ന ആ രഘുവിനെ യാത്രക്കിടയിൽ സംവിധായകർ കെ.ജി. ജോർജും നടൻ ശ്രീനിവാസനും കണ്ടുമുട്ടുകയും അഭിനയത്തിലേക്ക് കൂട്ടികൊണ്ടുവരികയും ആയിരുന്നു. പിന്നീട് മേള എന്ന സിനിമയിലെ നായകനാവുകയും രഘു മേള രഘു ആയി മാറുകയും ചെയ്തു.
