തമിഴിലെ എക്കാലത്തേയും സൂപ്പർ ഹിറ്റ് ചിത്രങ്ങളിലൊന്നായ ‘വിക്രം വേദ’യുടെ ഹിന്ദി റീമേക്ക് വരുന്നു. ഹൃത്വിക് റോഷനും സെയ്ഫ് അലി ഖാനുമാണ് ചിത്രത്തിൽ മുഖ്യ വേഷങ്ങളിലെന്നത്. തമിഴിൽ വിജയ് സേതുപതി അവതരിപ്പിച്ച വേദ എന്ന ഗ്യാങ്സ്റ്ററുടെ കഥാപാത്രമായാണ് ഹിന്ദിയിൽ ഋത്വിക് റോഷനെത്തുന്നത്. മാധവൻ അവതരിപ്പിച്ച പോലീസ് ഉദ്യോഗസ്ഥനായ വിക്രം എന്ന കഥാപാത്രമായി സെയ്ഫ് അലി ഖാനും അഭിനയിക്കും.
തമിഴിൽ വിക്രം വേദ സംവിധാനം ചെയ്ത പുഷ്‌കര്‍, ഗായത്രി എന്നിവര്‍ ചേര്‍ന്നാണ് ബോളിവുഡിലും ചിത്രം ഒരുക്കുന്നത്. ഈ വര്‍ഷം തന്നെ സിനിമയുടെ ചിത്രീകരണം ആരംഭിക്കുമെന്ന് പിങ്ക് വില്ല ഓൺലൈൻ റിപ്പോര്‍ട്ട് ചെയ്തിരിക്കുകയാണ്. സിനിമയുടെ പ്രീ പ്രൊഡക്ഷന്‍ പരിപാടികള്‍ നടന്നുവരികയാണ്. 2017ലാണ് വിക്രം വേദ റിലീസ് ചെയ്തിരുന്നത്. മാധവനും വിജയ് സേതുപതിയും ചേർ‍ന്നുള്ള കോമ്പിനേഷൻ സീനുകളായിരുന്നു സിനിമയുടെ ഹൈലൈറ്റ്. ഹിന്ദിയിലും ഹൃത്വികും സെയ്ഫും ചേർന്ന് കിടിലൻ കോമ്പിനേഷൻ സീനുകള്‍ ഒരുക്കുമെന്നാണ് ഇരുവരുടേയും ആരാധകരുടെ പ്രതീക്ഷ.
110 കോടിയിൽ ഒരുക്കിയ ചിത്രം ബോക്സോഫീസിൽ നിന്ന് 600 കോടി രൂപ സ്വന്തമാക്കിയിരുന്നു. മാധവനും വിജയ് സേതുപതിക്കും പുറമെ ശ്രദ്ധ ശ്രീനാഥ്, കതിര്‍, വരലക്ഷ്മി ശരത്ത് കുമാര്‍ തുടങ്ങി നിരവധി താരങ്ങളായിരുന്നു ചിത്രത്തിലുണ്ടായിരുന്നത്.വൈ നോട്ട് സ്റ്റുഡിയോസിന്‍റെ ബാനറില്‍ എസ് ശശികാന്താണ് വിക്രം വേദ നിര്‍മ്മിച്ചിരുന്നത്. ഹിന്ദിയിൽ ചിത്രം നിർമ്മിക്കുന്നതാരാണെന്ന് ഇതുവരെ പുറത്തുവിട്ടിട്ടില്ല. ഭൂത് പോലീസ്, ആദിപുരുഷ് തുടങ്ങി നിരവധി സിനിമകളാണ് സെയ്ഫ് അഭിനയിച്ച് ഒരുങ്ങുന്നത്. കൃഷ് 4, ഫൈറ്റേഴ്സ് തുടങ്ങി നിരവധി സിനിമകളാണ് ഹൃത്വിക് അഭിനയിച്ച് പുറത്തിറങ്ങാനായിരിക്കുന്നത്.
