അമ്മയുടെ കഥകളി അരങ്ങേറ്റം കാണാന്‍ നടി മഞ്ജു വാര്യർ എത്തി. കുട്ടിക്കാലം മുതല്‍ മനസ്സില്‍ കൊണ്ടു നടന്ന സ്വപ്നത്തിന്‍റെ സാക്ഷാത്ക്കാരമായിരുന്നു അമ്മ ഗിരിജ മാധവന് ഈ അരങ്ങേറ്റം. തൃശൂർ പെരുവനം മഹാദേവ ക്ഷേത്രത്തിലെ ശിവരാത്രി ആഘോഷത്തിന്‍റെ ഭാഗമായായുള്ള വേദിയിലായിരുന്നു മഞ്ജു വാര്യരുടെ അമ്മയുടെ അരങ്ങേറ്റം. തന്‍റെ നൃത്ത പരിപാടികളിൽ എന്നും ടെൻഷനടിച്ച് ഓടി നടന്നിരുന്ന അമ്മക്കായി ഇപ്പോൾ താൻ ടെൻഷനിലാണെന്ന് മഞ്ജു വാര്യർ പറഞ്ഞു.
ഗിരിജാ മാധവനിത് സ്വപ്ന സാക്ഷത്കാരമാണ്. കല്യാണ സൗഗന്ധികത്തിലെ ദ്രൗപദിയെയാണ് ഗിരിജ അവതരിപ്പിച്ചത്. പ്രായം സ്വപ്നങ്ങൾക്ക് വിലങ്ങ് തടിയല്ലെന്ന് ഒരിക്കൽ കൂടി തെളിയിക്കുന്നതായിരുന്നു അരങ്ങേറ്റം. കലാനിലയം ഗോപി ആശാന്‍റെ ശിക്ഷണത്തില്‍ കഥകളി അഭ്യസിച്ച ഗിരിജ, കഥകളി പദങ്ങൾക്കൊത്ത് ചുവട് വെച്ചപ്പോൾ അമ്മയ്ക്കും മകൾക്കും അത് അഭിമാന നിമിഷമായി. ഗിരിജാ മാധവന്‍റെ ഏറെ നാളായുള്ള ആഗ്രഹമായിരുന്നു നൃത്ത പഠനം. അതിന് മഞ്ജുവിന്‍റെ പൂര്‍ണ്ണ പിന്തുണയും ഉണ്ടായിരുന്നു. രണ്ട് വർഷമായി ഗിരിജ കഥകളി അഭ്യസിക്കാൻ തുടങ്ങിയിട്ട്.
കൊവിഡ് മൂലം ആറുമാസം ഓൺലൈനിലായിരുന്നു പഠനം. കഥകളിക്കൊപ്പം മോഹിനിയാട്ടവും യോഗയും പരിശീലിക്കുന്നുണ്ട്. ഗിരിജക്കൊപ്പം ഭീമനായി ലിൻസിയും അരങ്ങിലെത്തി. മഞ്ജുവിനൊപ്പം സഹോദരൻ മധു വാര്യരുടെ ഭാര്യയും മകളും അരങ്ങേറ്റം കാണാനെത്തിയിരുന്നു. പെരിങ്ങോട്ടുകര സർവതോഭദ്രം കലാകേന്ദ്രം ശ്രീ ആവണങ്ങാട്ടിൽ കളരി കഥകളി ട്രൂപ്പാണ് കഥകളി അവതരിപ്പിച്ചത്.
