ഉണ്ണി മുകുന്ദൻ, അഞ്ജു കുര്യൻ എന്നിവർ കേന്ദ്ര കഥാപാത്രങ്ങളാകുന്ന ചിത്രമാണ് മേപ്പടിയാൻ. സിനിമാപ്രേമികൾ ഏറെ ആകാംക്ഷയോടെ ഉറ്റുനോക്കുന്ന ചിത്രം കൂടിയാണ് ഇത്. ചിത്രത്തിലെ ആദ്യ ഗാനം പുറത്തു വിട്ടിരിക്കുകയാണ് അണിയറപ്രവർത്തകർ ഇപ്പോൾ. കാർത്തിക്, നിത്യ മാമൻ എന്നിവർ ചേർന്നാലപിച്ച ‘കണ്ണിൽ മിന്നും…’ എന്ന് തുടങ്ങുന്ന ഗാനമാണ് ഇപ്പോൾ പുറത്ത് വിട്ടിരിക്കുന്നത്. വിഷ്ണു മോഹനാണ് ചിത്രം സംവിധാനം ചെയ്യുന്നത്.
ഉണ്ണി മുകുന്ദൻ ഫിലിംസാണ് ചിത്രം നിർമ്മിച്ചിരിക്കുന്നത്. ഉണ്ണിമുകുന്ദൻ ഫിലിംസ് ആദ്യമായി നിർമ്മിക്കുന്ന ചിത്രമാണ് മേപ്പടിയാൻ. രാഹുൽ സുബ്രമണ്യനാണ് ഈ ഗാനത്തിന് ഈണമിട്ടിരിക്കുന്നത്. ഗാനത്തിൻ്റെ വരികൾ രചിച്ചിരിക്കുന്നത് അജീഷ് ദാസനും ജോ പോളും ചേർന്നാണ്. ചിത്രത്തിനായി ഉണ്ണി മുകുന്ദൻ ശരീരഭാരം കൂട്ടിയിരുന്നു. തുടർന്ന് താരം തൻ്റെ ശരീരഭാരം കുറയ്ക്കുന്നതിൻ്റെ ഓരോ ഘട്ടങ്ങളും ആരാധകരുമായി പങ്കുവെക്കുകയാണ്. ഷൂട്ടിംഗ് പൂർത്തിയായ ചിത്രത്തിൻ്റെ തിയേറ്റർ റിലീസ് ഉടനുണ്ടാകുമെന്നാണ് ആരാധകർ പ്രതീക്ഷിക്കുന്നത്. ഉണ്ണി മുകുന്ദൻ്റെ കരിയറിലെ തന്നെ പ്രധാന ചിത്രമാകും മേപ്പടിയാൻ എന്നാണ് അണിയറ പ്രവര്ത്തകരുടെ വാദം.
മേപ്പടിയാനിൽ ജയകൃഷ്ണൻ എന്ന കഥാപാത്രമായാണ് ഉണ്ണി മുകുന്ദൻ എത്തുന്നത്. ചിത്രത്തിൻ്റെ കഥ ഒരുക്കിയിരിക്കുന്നതും വിഷ്ണു മോഹനാണ്. നീൽ ഡി കുൻഹയാണ് ഛായാഗ്രഹണം. ഹാരിസ് ദേശമാണ് ലൈൻ പ്രൊഡ്യൂസര്. ഷമീര് മുഹമ്മദ് ചിത്രസംയോജനം നിര്വ്വഹിക്കുന്നു. രാഹുൽ സുബ്രഹ്മണ്യം സംഗീത സംവിധാനം ഒരുക്കുമ്പോൾ കലാസംവിധാനം നിര്വ്വഹിക്കുന്നത് സാബു മോഹനാണ്. സൈജു കുറുപ്, കലാഭവൻ ഷാജോൺ, കുണ്ടറ ജോണി, ലെന, ഹരീഷ് കണാരൻ, ശ്രീനിവാസൻ, അലൻസിയര് തുടങ്ങിയവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.