ദുൽഖർ സൽമാൻ ആദ്യമായി മുഴുനീള പോലീസ് വേഷത്തിൽ അഭിനയിക്കുന്ന സിനിമയുടെ ടൈറ്റിൽ പ്രഖ്യാപിച്ചു. റോഷൻ ആൻഡ്രൂസ് ഒരുക്കുന്ന ചിത്രത്തിന് ‘സല്യൂട്ട്’ എന്നാണ് പേര് നൽകിയിരിക്കുന്നത്. ദുൽഖര്‍ പോലീസ് വേഷത്തിൽ നിൽക്കുന്ന ചിത്രത്തോടെയാണ് പുതിയ പോസ്റ്റര്‍ എത്തിയിരിക്കുന്നത്. ദുൽഖര്‍ തന്നെയാണിത് സോഷ്യൽമീഡിയയിൽ പങ്കുവെച്ചിരിക്കുന്നത്. കഴിഞ്ഞ ദിവസം പോലീസ് എന്നെഴുതിയ ഒരു ബുള്ളറ്റിന്‍റെ ചിത്രമുള്ള പോസ്റ്ററാണ് താരം പങ്കുവെച്ചിരുന്നത്.
അതിന് പിന്നാലെയാണിപ്പോള്‍ സിനിമയുടെ പേര് പ്രഖ്യാപിച്ചുകൊണ്ടുള്ള പോസ്റ്റര്‍ എത്തിയിരിക്കുന്നത്. ദുൽഖറും റോഷൻ ആൻഡ്രൂസും ഒരുമിക്കുന്ന ആദ്യ ചിത്രം കൂടിയാണിത്. തിരക്കഥയൊരുക്കുന്നത് നിരവധി ശ്രദ്ധേയ സിനിമകൾക്ക് തിരക്കഥയൊരുക്കിയ ബോബി സഞ്ജയ് ആണ്.
ദുൽഖറിന്‍റെ നിര്‍മ്മാണ കമ്പനി വേഫറെർ ഫിലിംസിന്‍റെ ബാനറിൽ നിർമ്മിക്കുന്ന അഞ്ചാമത്തെ ചിത്രം കൂടിയാണിത്. ബോളിവുഡ് താരവും മോഡലുമായ ഡയാന പെന്‍റിയാണ് സിനിമയിലെ നായിക. മനോജ് കെ ജയൻ,അലൻസിയർ,ബിനു പപ്പു ,വിജയകുമാർ ,ലക്ഷ്മി ഗോപാലസ്വാമി, സാനിയ ഇയ്യപ്പൻ തുടങ്ങിയവർ സിനിമയിൽ മറ്റു പ്രധാന വേഷങ്ങളിൽ എത്തുന്നുണ്ട്.
തെന്നിന്ത്യയിലെ ശ്രദ്ധേയ സംഗീതജ്ഞനായ സന്തോഷ് നാരായണനാണ് ചിത്രത്തിന് വേണ്ടി സംഗീതമൊരുക്കുന്നത്. പിസ, സൂദു കാവും, കുക്കൂ, ജിഗർതണ്ട, മദ്രാസ്, കബാലി,കാല, പറയേറും പെരുമാൾ, വട ചെന്നൈ തുടങ്ങിയ ഹിറ്റ്‌ ചിത്രങ്ങൾക്ക് സംഗീതമൊരുക്കിയയാളാണ് സന്തോഷ് നാരായണൻ. ഛായാഗ്രഹണം അസ്‍ലം പുരയിൽ, എഡിറ്റർ ശ്രീകർ പ്രസാദ്, മേക്കപ്പ് സജി കൊരട്ടി, വസ്ത്രാലങ്കാരം സുജിത് സുധാകരൻ, ആർട്ട് സിറിൽ കുരുവിള, സ്റ്റിൽസ് രോഹിത്, പ്രൊഡക്ഷൻ കൺട്രോളർ സിദ്ധു പനയ്ക്കൽ, പിആർഒ മഞ്ജു ഗോപിനാഥ്
